Policia e Tiranës është njoftuar nga Partia Demokratike për tubimin që do të mbahet të martën në orën 17:00 me bllokimin e disa akseve kyçe. Në kryeqytet, protestuesit do të bllokojnë mbikalimin e Kthesës së Kamzës, në hyrje të Tiranës.
Policia është njoftuar për 3 orë, por nuk dihet se sa do të vijojë qëndrimi i tyre. Policia nuk ka dijeni për ndonjë skenar tjetër të protestuesve, nëse do të qëndrojnë vetëm aty apo do të lëvizin në pika të tjera.
Sipas të njëjtave burime, kjo protestë pritet të sjellë bllokim rrugësh në Milot, Shkozet, rrethrrotullimin e Rrogozhinës, Levanit dhe Bradasheshit.
Aksioni i radhës i opozitës vjen pasi 30 deputetë të grupit parlamentar demokrat protestuan në mbrojtje të kauzës së tyre para Parlamentit Europian në Strasburg.
Sipas demokratëve, përpjekjet e opozitës për të garantuar shtetin ligjor dhe zgjedhjet e lira në Shqipëri, janë rruga e vetme që e afron Shqipërinë në familjen europiane.
Sjellim në vëmendje se më 7 Tetor, opozita zhvilloi një protestë në Tiranë që u shoqërua me bllokim rrugësh, veprime të dhunshme, si dhe hedhje të mjeteve piroteknike në drejtim të institucioneve në kryeqytet
