Kuvendi i Shqipërisë miratoi sot në seancë plenare një projektrezolutë dhe tre projektligje, ndërsa seanca u zhvillua pa pjesëmarrjen e deputetëve të Partisë Demokratike.
Me 71 vota pro u miratua projektrezoluta “Për vlerësimin e veprimtarisë së Komisionerit për Mbrojtjen nga Diskriminimi për vitin 2025”.
Po ashtu, me të njëjtin numër votash, Kuvendi miratoi projektligjin “Për ratifikimin e marrëveshjes së garancisë ndërmjet Republikës së Shqipërisë dhe Bankës Evropiane për Rindërtim dhe Zhvillim (BERZH), për projektin e nënstacionit të OSHEE-së Tiranë”.
Deputetët miratuan gjithashtu me 72 vota pro projektligjin “Për disa ndryshime dhe shtesa në ligjin nr. 90/2012 “Për organizimin dhe funksionimin e administratës shtetërore”, si dhe projektligjin “Për disa ndryshime dhe shtesa në ligjin nr. 8391, datë 28.10.1998 “Për Shërbimin Informativ Kombëtar”, të ndryshuar”.
Seanca u shoqërua me mungesën e grupit parlamentar të Partisë Demokratike, i cili bojkotoi punimet duke kërkuar që të trajtohen kërkesat e protestuesve.
