Kuvendi mbajti sot 1 minutë heshtje në nderim të aktivistit shqiptaro-amerikan, Profesor Sami Repishti.
Pas kërkesës së kryetarit të Partisë Demokratike, Sali Berisha, kryetarja e Kuvendit Elisa Spiropali ftoi Kuvendin të mbajë një minutë heshtje.
“Në nderim të profesorit Sami Repishti, një figurë e nderuar, e dashur, një figurë antikomuniste me vlera të larta, mbajmë këtë minutë heshtje në nderim të tij në Parlamentin e Shqipërisë. U kujtoftë gjithmonë”, tha Spiropali.
Nga ana e tij Berisha vlerësoi se Sami Repishti ishte një kolos i mendimit intelektual shqiptar dhe avokat i pamposhtur i çështjes kombëtare.
“Një luftëtar i paepur kundër diktaturës komuniste, një martir i gjallë që përjetoi në vitet e e para të diktaturës barbarinë dhe torturat më çnjerëzore. Profesor Sami Repishti ishte ndër më të shquarit shqiptar në diasporën dhe emigracionin tonë. Fjala dhe pena e tij nuk reshti kurrë së mbrojturi çështjen kombëtare dhe interesin kombëtar. Një antikomunist i vendosur, ai i dëshmoi me shkrimet e tij mbarë botës sjelljen e vërtetë të regjimit të Hitlerit shqiptar të pasluftës Enver Hoxhës dha një kontribut dhe fjala e tij, u dëgjua në të gjitha instancat e shtetit amerikan për të drejtat e shqiptarëve të pushtuar në Kosovë”, tha Berisha.
Prof. Sami Repishti, i mbijetuar nga burgjet e komunizmit në Shqipëri ndërroi jetë të mërkurën më 27 nëntor 2024, në moshën 99-vjeçare.
