Këmba e atletit (tinea pedis) është një infeksion mykotik që shfaqet zakonisht në pjesën mes gishtërinjve. Ky infeksion është i përhapur sidomos te njerëzit që iu djersiten këmbët shumë ndërkohë që veshin këpucë të ngushta.
Infeksionet mykotike janë pothuajse 100 % të shërueshme. Sot ka një gamë mjaft të madhe medikamentesh antimykotike, qofshin këto sistemike apo me përdorim lokal (tableta, pomada të ndryshme), por që duhen përdorur gjithmonë me rekomandimin e mjekut.
Simptomat
Ankesat më të shpeshta të pacientëve janë kruajtja e fortë dhe bezdisëse në zonat e lëkurës ku është myku, skuqja e lëkurës dhe rrjepja e saj. Në disa rate shkaktohen ulcera ose flluska. Infeksioni shkakton edhe tharje kronike të këmbëve dhe rrjepje të shollës. Ndodh që kjo të ngatërrohet me ekzemën ose si lëkurë e thatë. Infeksioni mund të prekë njërën ose të dyja këmbët, dhe të përhapet edhe në duar – sidomos nëse prekni me duar pjesët e infektuara në këmbë.
Shkaqet
Këmba e atletit shkaktohet nga një infeksion fungal. Mbajtja e këpucëve veshur për një kohë të gjatë, lagështia, mungesa e ajrosjes, të gjitha këto favorizojnë rritjen e organizmave.
Ky infeksion është ngjitës dhe mund të përhapet nga një person i infektuar ose nga përdorimi i të njejtëve peshqirë, këpucëve etj. Këmba e atletit bëhet më e zakonshme me kalimin e moshës.
Parandalimi
Për të parandaluar zhvillimin e këtij infeksioni ose për të lehtësuar simptomat nëse infeksioni është shfaqur, duhet të ndiqni këto këshilla:
I mbani këmbët e thata, sidomos te pjesa mes gishtërinjve
Hiqini çorapet dhe këpucët dhe përpiquni t’i ajrosni sa më shumë këmbët kur jeni në shtëpi. Pasi të laheni, i thani pjesët mes gishtërinjve me peshqirë.
Vishni çorape me material të mirë dhe ndërrojini rregullisht
Nëse këmbët ju djersiten shumë shpejtë, ndërroni çorapet dy herë në ditë. Blini çorape me material pambuku, leshi ose fibra sintetike të cilat e thithin lagështirën nga këmba.
Mbroni këmbët në vendet publike
Vishni sandale ose këpucë rezistente ndaj ujit në pishinat publike, dushet ose ambientet e mbyllura.
Mos i shkëmbeni këpucët
Shkëmbimi i këpucëve me të tjerët rrit rrezikun për përhapjen e infeksionit mykotik.
Alternoni këpucët
Mos vishni të njëjtat këpucë çdo ditë. Kështu do t’iu jepni kohë këpucëve që të thahen pas çdo përdorimi.
Trajtoni infeksionin mykotik
Infeksionet mykotike janë pothuajse 100 % të shërueshme. Sot ka një gamë mjaft të madhe medikamentesh antimykotike, qofshin këto sistemike apo me përdorim lokal (tableta, pomada të ndryshme), por që duhen përdorur gjithmonë me rekomandimin e mjekut.
