Ish-ministri Beqaj reagon pas masës së sigurisë: Nuk do ta ankimoj.

Ish-Ministri i Shëndetësisë Ilir Beqaj ka reaguar pas masës së sigurisë të vendosur nga SPAK, detyrim paraqitje, për çështjen e sterilizimit. Në një postim në rrjetet sociale, ai thotë se nuk do ta ankimojë këtë masë, ndërsa shprehet besimplotë se “në fund të këtij procesi emri i tij do të pastrohet përfundimisht nga çdo akuzë e pabazuar”.

“Mbrëmjen e djeshme, menjëherë pas kthimit tim nga një udhëtim pune jashtë vendit, jam kontaktuar nga oficerë të SPAK/BKH, të cilët kërkuan paraqitjen time në mjediset e tyre, për të më komunikuar dhe dorëzuar një kopje të vendimit të datës 16.11.2023, të gjyqtarit të posaçëm, z. Erjon Bani, dhënë në bazë të kërkesës së bërë nga vetë organi i Prokurorisë, nëpërmjet të cilit ishte vendosur që për nevoja të procedimit penal nr. 13, të vitit 2020, që lidhet me çështjen e quajtur te sterilizimit, ndaj meje të merrej masa e sigurimit “detyrim për paraqitje në Policinë Gjyqësore” dhe “ndalim i daljes jashtë shtetit”.

Edhe pse kam rezerva serioze lidhur me disa aspekte të vendimit në fjalë dhe avokatët e mi, në identifikim të një sërë shkeljeve procedurale dhe materiale që në këtë fazë të procesit më kanë sugjeruar ankimimin e këtij vendimi, unë kam vendosur të mos e ankimoj këtë vendim dhe ti nënshtrohem me vullnet të plotë kërkesave dhe garancive që ky proces hetimor kërkon për zhvillimin e tij normal dhe të rregullt. Disponibiliteti im karshi zbardhjes sa më parë të së vërtetës së kësaj çështje shkon përtej kufizimeve të lirive të mia vetjake dhe madje përtej një afati normal kohor, tashmë disa vjeçar.

Përpos kësaj, për të garantuar integritetin e procesit hetimor dhe për të shmangur çdo keqinterpretim të mundshëm të ndikimit tim si zyrtar në këtë proces, kam vlerësuar gjithashtu që të ndërpres angazhimin tim aktual si drejtues i Agjencisë Shtetërore të Programimit Strategjik dhe Koordinimit të Ndihmës.

Unë shpresoj që kjo çështje të zgjidhet shpejt dhe në mënyrë të plotë, duke vënë drejtësinë dhe të vërtetën mbi çdo paragjykim dhe sulm politik. Besoj fort që ajo çka kemi arritur me sterilizimin ka qenë një domosdoshmëri dhe më e mira e mundshme që ne mund të bënim në realizimin e një objektivi të tillë ambicioz si kujdesi per shendetin e shqiptareve. Besoj fort që në fund të këtij procesi emri im do të pastrohet përfundimisht nga çdo akuzë e pabazuar.

Në një njoftim zyrtar, Prokuroria e Posaçme tha se ish-ministri ka konsumuar veprën penale të shpërdorimit të detyrës në lidhje me procedurat e ndjekur për koncesionin e sterilizimit të pajisjeve kirurgjikale, me vlerë 100 milionë Euro.

Kështu sipas hetimeve të zhvilluara deri në këtë fazë, ish-ministri akuzohet për shkelje të barazisë në tendera apo ankande publike si dhe për korrupsion pasiv i zyrtarëve të lartë apo zgjedhurve vendorë e kryer në bashkëpunim. Krahas masës së sigurisë, ndaj ish-ministrit është caktuar dhe masa e ndalimit për të dalë jashtë vendit.

Shtrirja e hetimeve në rolin që Ilir Beqja ka patur në këtë koncesion, u sugjerua nga Gjykata e Posaçme, e cila kërkoi nga SPAK që krahas 9 të pandehurve të verifikojë dhe rolin e disa personave të tjerë mes të cilëve të ish-ministrin.

Më herët po për dosjen e sterilizimit me kërkesë të SPAK, është caktuar masa e sigurisë arrest me burg për ish zv/ministrin e shëndetësisë, Klodian Rjepaj dhe biznesmenin që zhvilloi koncesionin Ilir Rrapaj, ndërsa për pjesën tjetër gjykata ka vendosur “arrest në shtëpi” dhe “detyrim paraqitje”.

- ISLAMSHOP.CH -spot_img

LEXO MË SHUMË

Së fundi