I dërguari special i Shteteve të Bashkuara të Amerikës për Ballkanin Perëndimor, Gabriel Escobar mbërriti për një vizitë në Sarajevë.
Në bisedimet fillestare me ambasadorin e SHBA-së në Bosnjë-Hercegovinë, Michael Murphy dhe ministrin e Mbrojtjes të Bosnjës Zukan Helez, u diskutua përkushtimi i Shteteve të Bashkuara të Amerikës për integritetin territorial, sovranitetin dhe karakterin multietnik të Bosnjë-Hercegovinës.
Në të njëjtën kohë, Escobar shprehu mbështetjen e tij të fortë për Forcat e Armatosura të Bosnjës, duke theksuar nevojën për vazhdimin dhe thellimin e reformave në fushën e mbrojtjes, me synimin për anëtarësimin e vendit ballkanik në NATO.
Sipas ambasadës amerikane, qëllimi i vizitës së Escobar në Sarajevë është të diskutojë situatën në vend me lidershipin vendas në dritën e përshkallëzimit të sulmeve, ndaj Marrëveshjes së Paqes të Dejtonit, rendit kushtetues dhe shtetit boshnjak.
