Ministria e Industrisë, Ndërmarrësisë dhe Tregtisë, në bashkëpunim me Ministrinë e Ekonomisë dhe me mbështetjen e Luksemburgut, ka çelur dy skema të reja grantesh, të destinuara për të nxitur inovacionin teknologjik, tranzicionin energjetik dhe rritjen e konkurrueshmërisë së ndërmarrjeve mikro, të vogla, të mesme dhe bizneseve startup në Kosovë.
Ministrja në detyrë e Industrisë, Ndërmarrësisë dhe Tregtisë, Mimoza Kusari-Lila, tha se skema e granteve për inovacion synon të mbështesë zhvillimin e produkteve, shërbimeve dhe proceseve inovative, duke kontribuar në zhvillimin ekonomik të vendit.
Ministrja në detyrë e Ekonomisë, Artane Rizvanolli, prezantoi fazën e dytë të skemës së granteve për energji të pastër, e cila mbështet investimet në burime të ripërtëritshme të energjisë, efiçiencën e ndërtesave dhe modernizimin e pajisjeve të prodhimit.
I ngarkuari me punë i Dukatit të Madh të Luksemburgut në Kosovë, Eric Dietz, tha se të dyja skemat janë pjesë e përpjekjeve për të mbështetur transformimin teknologjik dhe energjetik të sektorit privat.
Bizneset që plotësojnë kriteret mund të aplikojnë për të dyja skemat përmes platformës e-Kosova.
