Për vite me radhë, aktiviteti fizik për shëndetin e zemrës është lidhur kryesisht me ecjen dhe ushtrimet aerobike, shkruan salute.eu.
Por një studim i ri sugjeron se edhe stërvitja e forcës mund të luajë një rol të rëndësishëm në mbrojtjen e shëndetit kardiovaskular te gratë.
Studimi, i kryer te më shumë se 117 mijë gra, analizoi lidhjen mes ushtrimeve të rezistencës dhe rrezikut për ngjarje të rënda kardiovaskulare.
Ushtrimet përfshinin përdorimin e peshave, shiritave elastikë, makinerive të palestrës ose thjesht peshën e trupit.
Sipas rezultateve, gratë që kryenin të paktën dy orë në javë stërvitje force kishin një rrezik relativisht 20% më të ulët për ngjarje të mëdha kardiovaskulare dhe 44% më të ulët për infarkt, krahasuar me gratë që nuk kryenin këtë lloj aktiviteti.
Në rastin e goditjes në tru, studimi nuk evidentoi një ulje të konsiderueshme të rrezikut.
Autorët theksojnë se stërvitja e forcës nuk duhet të shihet si zëvendësim i aktivitetit aerobik. Përfitimi më i madh u vu re te gratë që kombinonin ushtrimet e forcës me aktivitetin aerobik dhe më pak kohë të kaluar ulur.
Ndikimi te arteriet
Autorët sugjerojnë se ushtrimet e rezistencës mund të ndikojnë edhe në disa mekanizma të përfshirë në zhvillimin e sëmundjeve koronare.
Stërvitja mund të përmirësojë metabolizmin e yndyrave, funksionin e enëve të gjakut kontrollin e glicemisë dhe proceset inflamatore.
Këta faktorë lidhen me zhvillimin e aterosklerozës, procesit në të cilin krijohen pllaka në muret e arterieve.
Megjithatë, studiuesit bëjnë një sqarim të rëndësishëm: studimi nuk ka matur drejtpërdrejt as madhësinë dhe as qëndrueshmërinë e pllakave aterosklerotike.
Sipas ekspertit Mattioli, autorët supozojnë se përmirësimi i metabolizmit të yndyrave, funksionit të endotelit, inflamacionit dhe kontrollit të sheqerit në gjak mund të ngadalësojë aterosklerozën dhe të favorizojë krijimin e pllakave më të qëndrueshme.
Por kjo mbetet një hipotezë biologjikisht e besueshme dhe jo një efekt i provuar drejtpërdrejt nga studimi.
Për këtë arsye, nuk mund të thuhet se ushtrimet me pesha i bëjnë patjetër më të qëndrueshme pllakat në arterie.
Ajo që mund të thuhet është se aktiviteti fizik përmirëson disa prej faktorëve që lidhen me zhvillimin e aterosklerozës dhe sëmundjeve koronare.
Studimi mbështet kështu një qasje të kombinuar ndaj aktivitetit fizik, ku forca, aktiviteti aerobik dhe reduktimi i kohës sedentare mund të jenë pjesë e një strategjie të përgjithshme për shëndetin kardiovaskular.
