Të dhëna të reja mësohen lidhur me ekzekutimin e 34-vjeçarit Kristian Kola mbrëmjen e kaluar në Shkodër.
I riu ka qenë duke pirë kafe në ambientet e jashtme të një hoteli, kur papritmas është qëlluar me armë disa herë nga dy persona të paidentifikuar ende.
Kamerat e sigurisë dhe rrëfimet e dëshmitarëve kanë treguar se autorët ishin mbi motor dhe me skafandra mbi kokë.
“Të dhënat e deritanishme flasin për dy autorë të cilët kanë qenë me motor, me skafandra në kokë që janë afruar dhe kanë qëlluar mbi Kristian Kolën, 34-vjeç, i cili qëndronte në pjesën e jashtme të një lokali.”, . Sipas raportimeve, i riu në momentin kur është qëlluar ishte ngritur në këmbë dhe mendohet se po bisedonte në telefon.
Ngjarja e rëndë ndodhi në një orar dhe në një zonë shumë të frekuentuar të qytetit verior, konkretisht rreth orës 22:30 përballë Kinema Millenium.
Policia po vijon intensivisht hetimet sa i takon ekzekutimit të 34-vjeçarit, duke sekuestruar kamerat e sigurisë, thirrur dëshmitarë të ndryshëm, duke nisur nga miq dhe njerëz nga rrethi i afërt i viktimës, për të arritur në një pistë. Po ashtu janë ngritur dhe postoblloqe deri pas mesnatës së kaluar.
Deri më tani nuk ka asnjë pistë se kush mund të jenë dy autorët. “Janë marrë disa dëshmitarë, shoqëria, rrethi i të njohurve për të arritur në një pistë. Kola nuk kishte precedent të mëparshëm penal. Ai lëvizte i lirshëm dhe nuk dukej se kishte marrë kërcënime apo paralajmërime. Ky atentat e ka zënë dhe atë në befasi, kur ka marrë disa plumba në kraharor çka ka rezultuar fatale për të riun.”
Kështu mbeten akoma mister shkaqet dhe motivet.
