Presidenti amerikan, Joe Biden dënoi në një deklaratë “në termat më të fortë të mundshëm, luftën e vazhdueshme të Rusisë kundër Ukrainës dhe përpjekjet e saj për të zhytur popullin ukrainas në errësirë”.
”Dua të jem i qartë. Rusia nuk do të ketë kurrë sukses në Ukrainë dhe shpirti i popullit ukrainas nuk do të thyhet kurrë”, shtoi ai.
“SHBA do të vazhdojë të udhëheqë një koalicion prej mbi 50 vendesh në mbështetje të Ukrainës”, premton ai.
”Ky koalicion po i siguron Ukrainës pajisje të rëndësishme ushtarake, përfshirë sistemet e mbrojtjes ajrore dhe interceptorët, siç njoftova në samitin e NATO-s në korrik. SHBA dhe aleatët tanë i kanë dhënë Ukrainës pajisje për pesë sisteme të tjera strategjike të mbrojtjes ajrore. SHBA po dërgon gjithashtu pajisje energjetike në masë në Ukrainë për të riparuar sistemet e saj dhe për të forcuar elasticitetin e rrjetit energjetik ukrainas”, theksoi Biden.
“Siç i thashë presidentit Zelensky më 23 gusht, mbështetja e SHBA për Ukrainën është e palëkundur. Që nga shkurti 2022, populli ukrainas është mbrojtur me guxim nga pushtimi rus, duke rimarrë më shumë se gjysmën e territorit që forcat ruse kishin pushtuar”, tha ai.
”Ukraina mbetet një komb i lirë, sovran dhe i pavarur dhe forcat ukrainase po luftojnë çdo ditë për të mbrojtur atdheun dhe lirinë e tyre. SHBA do të qëndrojë në krah të popullit ukrainas derisa ai të triumfojë”
