Ka mbërritur në mesin e protestuesve kryetari i Partisë Demokratike Sali Berisha. Kjo dalje e tij vjen pas thuajse një viti nën masën e “arrestit në shtëpi”. Ai u prit me ovacione nga mbështetësit te Rruga e Elbasanit në kryeqytet.
“Sot, një nga ditët më të veçanta të Dhjetorit, është përsëri dita e demokratëve. Ja ku jemi në detyrë, në protestë, në revolt, në mosbindje ndaj narkodiktatorit.
Ky dimër premton të jetë i vështirë si për argatin e Tiranës ashtu edhe për padronin e Beogradit.
Edhe atje po dridhin nga themelet diktatorin, edhe në Tiranë diktator nuk ka. I përshëndes nga zemra qytetarët që janë mbledhur sot nga të katër anët e vendit.
I siguroj se kjo mosbindje civile është në interesin e çdo qytetari të Shqipërisë dhe se ne nuk ndalojmë pa realizuar objektivat tona, qeverinë teknike e zgjedhjet e lira”, tha kreu i PD-së.
Po nëse Rama nuk e pranon qeverinë teknike, çfarë ndodh më 11 Maj 2025?
“Rrëzohet! Me mosbindje civile, është kodi i përmbysjes së diktatorëve. Gjer tani, format janë shfaqur në Parlament dhe kudo. E rëndësishme është që projekti i mosbindjes civile të vijojë, ata po përfundojnë si kufoma politike njëri pas tjetrit. Me Ramën ka betejë për zgjedhje!”, u përgjigj Berisha, duke shtuar se në “asnjë rast s’ka bojkotim të zgjedhjeve parlamentare.”
Sipas Berishës, opozita do vijojë me betejën e saj në çdo aspekt. U ndal edhe tek rrëzimi i kërkesës për një Komision Hetimor sa i takon Portit të Durrësit.
“Edi Rama është kreu i asaj afere, që është ndër më të mëdhatë në historinë e Evropës e të botës. Po përvetësohet nga Rama duke përdorur Alabbarin, për të vijuar me planet e tij të drogës. Ne s’pranojmë refuzimin, nuk tërhiqemi ne. Çdo formë e mosbindjes civile është e mundur”, deklaroi Berisha.
