Shefja e Komisionit Evropian, Ursula von der Leyen, i përsëriti presidentit Vuçiç kërkesën që të vendosë sanksione ndaj Moskës.
“Na duhet të shohim një shkallë më të madhe të përafrimit në politikën e jashtme, duke përfshirë vendosjen e sanksioneve kundër Rusisë.
E dimë që rruga e Serbisë drejt Bashkimit Evropian mund të jetë e gjatë, por ne po ofrojmë tani qasjen në tregun e përbashkët dhe një nivel më të lartë investimesh. BE ofron po ashtu një garanci të sigurt se familjet serbe do të jenë të sigurta dhe të ngrohta gjatë dimrit. Kemi për të ndërtuar Korridorin Transballkanik të Energjisë që do të lidhë Serbinë me vendet fqinje dhe ato të BE-së“, tha von der Leyen.
“Për Serbinë, anëtarësimi në BE është një angazhim strategjik dhe një përparësi e politikës së jashtme. Dhe kjo nuk do të ndryshojë. Gjithsesi, që nga fillimi i konfliktit në Ukrainë, nuk na është hapur asnjë kapitull i vetëm. Serbia po përballet me një situatë të vështirë në fushën e energjisë, por kemi siguruar rezerva të mëdha nafte dhe gazi. Megjithatë, duam mbështetjen tuaj, pasi, siç po shkojnë gjërat, do të jetë një dimër i vështirë politik për ne.
Nuk kemi bërë deklarata shumë optimiste në lidhje me pranimin në BE. Nuk mund të premtoj asgjë, përveç se do të punojmë me sakrificë, punë të palodhur dhe shpresoj se do të kemi mbështetjen e Brukselit“, tha Vuçiç.
Për dialogun me Kosovën, Vuçiç, si rrallëherë, nuk adresoi kritika ndaj Prishtinës këtë herë, pasi sipas tij, “duhen dy veta për të kërcyer tango”.
Protestat e studentëve i konsideroi ilegale, por sipas presidentit serb, ato nuk janë shoqëruar me të vrarë nga ana e policisë, ashtu siç ka ndodhur në disa shtete të Evropës Perëndimore.
Siç shtoi ai, Serbia po përballet me një situatë jo aq të lehtë në fushën e energjisë. Ai kujtoi se kompania NIS është nën sanksione amerikane, gjë që, shtoi ai, do të thotë se “de facto është edhe nën sanksione evropiane, dhe ky problem nuk është i lehtë dhe thjesht i zgjidhshëm për ne”.
