Sekretari amerikan i Mbrojtjes, Lloyd Austin, mbërriti sot në Ukrainë për një vizitë të paparalajmëruar, vizita e tij e katërt që nga marrja e postit në vitin 2021 dhe në një moment të pasigurt për vendin.
Austin shkroi në X se udhëtimi i tij kishte për qëllim të demonstronte se Shtetet e Bashkuara të Amerikës, së bashku me komunitetin ndërkombëtar, vazhdojnë të qëndrojnë pranë Ukrainës.
“Austin do të takohet me presidentin ukrainas Volodymyr Zelensky dhe ministrin e Mbrojtjes Rustem Umerov”, njoftuan mediet amerikane.
Vizita e tij në Kiev vjen në muajt e fundit të administratës Biden dhe perpara garës zgjedhore për Shtëpinë e Bardhë.
Zëvendëspresidentja demokrate Kamala Harris është zotuar të vazhdojë ndihmën ushtarake për Ukrainën nëse ajo fiton më 5 nëntor, ndërsa rivali i saj republikan Donald Trump ka shprehur antipati për mbështetje të mëtejshme.
SHBA-ja ka qenë mbështetësja më e madhe ushtarake dhe financiare e Ukrainës që nga fillimi i pushtimit gjithëpërfshirës rus në shkurt 2022.
Forcat ruse kanë bërë avancime të ngadalta por të qëndrueshme territoriale në Ukrainën lindore. Zelensky u ka bërë thirrje aleatëve të tij në Perëndim të lejojnë Ukrainën të godasë objektiva thellë brenda Rusisë, por kjo nuk ka patur rezultat.
