Një ngjarje historike në kozmos; dy vrima të zeza janë bashkuar, duke krijuar një fenomen të jashtëzakonshëm të hapësirës, kohës dhe gravitetit, sipas Reuters.
Shkencëtarët kanë arritur të regjistrojnë për herë të parë këtë bashkim me detaje të paprecedent, falë dallimit të valëve gravitacionale, një fenomen i parashikuar nga Albert Einstein dhe studiuar më tej nga Stephen Hawking.
Ngjarja ndodhi 1,3 miliardë vite dritë larg Tokës, në një galaksi jashtë “Rrugës së Qumështit”, dhe përfshiu dy vrima të zeza , njëra me masë 34 herë më të madhe se Dielli dhe tjetra 32 herë më e madhe.
Ato u bashkuan në një fraksion sekonde, duke formuar një vrimë të zezë të vetme me masë rreth 63 herë më të madhe se Dielli, që rrotullohej me rreth 100 xhiro në sekondë.
Energjia e lëshuar nga ky bashkim ishte kolosale, sa ekuivalon me shkatërrimin e tre yjeve të ngjashëm me Diellin, dhe u regjistrua në observatorët LIGO në Hanford, Uashington dhe Livingston, Luiziana.
Shkencëtarët analizuan frekuencat e këtyre valëve për të kuptuar karakteristikat thelbësore të vrimave të zeza para dhe pas bashkimit, duke i krahasuar ato me tingujt e një zile.
Rezultatet konfirmojnë një parim të rëndësishëm të Hawking; sipërfaqja totale e vrimave të zeza nuk duhet të zvogëlohet pas bashkimit. Para përplasjes, vrimat kishin një sipërfaqe totale prej rreth 240,000 km², ndërsa vrima e zezë e krijuar kishte rreth 400 000 km².
Ky zbulim vërteton gjithashtu thjeshtësinë paradoksale të vrimave të zeza, të parashikuar nga teoria e relativitetit e Einsteinit , që ato mund të përshkruhen vetëm nga masa dhe rrotullimi i tyre.
Sipas Katerina Chatziioannou nga Caltech, lëvizja spiralore e dy vrimave drejt njëra-tjetrës u regjistrua për rreth 200 milisekonda, ndërsa sinjali i vrimës së zezë të formuar zgjati vetëm 10 milisekonda, një rekord i paparë në historinë e astrofizikës.
