Kreu i Partisë Demokratike, Sali Berisha, në një bashkëbisedim online me ndjekësit e tij, i është përgjigjur pyetjes nëse do të ketë prej tij hetim ndaj patronazhistëve.
Berisha, i cili i cilësoi ata si “kriminelë dhe terroristë elektoralë”, u shpreh se do të gjykohen për të gjithë veprimtarinë e tyre.
Kryedemokrati shtoi më pas se sipas VOA-s, 20% e qytetarëve kanë votuar bazuar në kërkesat e patronazhistëve, duke cënuar kështu lirinë e të drejtës së votës së lirë.
Pyetje: A mund të ketë një hetim për patronazhistët që t’i njohin të gjithë se kush është paguar për të spiunuar?
Sali Berisha: Deklaroj me përgjegjësi të plotë përpara jush se çdo patronazhist e shpall kriminel elektoral! Terroristë elektoralë, dhe do të gjykohen me rreptësinë më të madhe për veprimtarinë e tyre kriminale elektorale.
Parmbrëmë, Zëri i Amerikës informoi shqiptarët dhe botën, se në Shqipëri, 20% e qytetarëve kanë votuar nën terrorin e patronazhistëve. I kanë rrëfyer Zërit të Amerikës se janë terrorizuar, janë frikësuar nga patronazhistët dhe kanë votuar me kërkesë të tyre.
I siguroj se do të mjerohen. Do mjerohen me ndërhyrjen e tyre, me krimin e tyre elektoral. Të mendohen 3 herë para se të bëjnë hapin e parë.
