Kryetari i Partisë Demokratike, Sali Berisha kërkoi sot gjatë një konference për mediet nga selia e kësaj partie hetim për ndërtimin e kampusit të Kolegjit Europian në Tiranë.
Duke u ndalur tek aktpadia e hapur nga institucionet evropiane të drejtësisë ndaj ish-përfaqësueses së lartë të diplomacisë së BE dhe rektores së Kolegjit të Evropës, Federica Mogherini, Berisha tha se hetimet duhet të zgjerohen.
Sipas tij, një marrëveshje e fshehtë midis qeverisë shqiptare dhe përfaqësuesve të BE-së ka përcaktuar ndërtimin e kampusit me një fond prej 17 milionë eurosh, duke përdorur truallin e parashikuar për Universitetin e Tiranës.
Ai vuri në dukje se bursat e studentëve janë përcaktuar në nivele të larta, “27 mijë euro për student, krahasuar me 29 mijë euro në Belgjikë, ndërkohë që kostoja e jetesës në Shqipëri është më e ulët”.
Gjithashtu, ai tha se, destinacioni i Piramidës është ndryshuar, duke e vendosur në përdorim të Kolegjit Europian.
Berisha vuri në dukje se hetimet në BE kanë pasur rezultate konkrete.
Ai kërkoi nga institucionet europiane të hetojnë marrëveshjen për kampusin europian dhe të analizojnë komunikimet midis palëve të përfshira, përfshirë emailet dhe komunikimet e koduara.
Berisha nënvizoi se, “opozita shqiptare është e gatshme të kontribuojë në zbardhjen e këtyre çështjeve në interes të qytetarëve dhe taksapaguesve europianë”.
