Kryeministrja britanike, Theresa May mund të heqë dorë të kalojë për herë të tretë në votimin e deputetëve marrëveshjen e tërheqjes që ajo negocioi me Bashkimin Europian, nëse nuk siguronte mbështetjen e nevojshme, deklaruan sot dy nga ministrat e saj.
“Nuk është e sigurtë nëse do të ketë votim’’, u shpreh për BBC-në, ministri i Financave, Philip Hammond. Ne do të prezantojmë marrëveshje të re vetëm nëse jemi të sigurtë që një numër i mjaftueshëm i kolegëve tanë dhe i DUP-së janë të gatshëm për ta mbështetur atë që të kalojë në parlament.
“Kjo do të varet nga aftësia jonë për të fituar këtë votim në Dhomën e Komuneve’’, deklaroi ministri për Tregtinë Ndërkombëtare, Liam Fox në Sky news, pasi theksoi se do të ishte e vështirë të justifikohej organizimi i një votimi nëse është i sigurtë dështimi.
Teksti u kundërshtua më 15 janar me 432 vota kundër dhe 202 pro, më pas të martën nga 391 vota kundër dhe 242 pro.
Kryeministrja po përpiqet të bindë euroskeptikët e ashpër të partisë së saj dhe deputetët e partisë së vogël së Irlandës së Veriut, DUP aleaten e saj në parlament, të cilët e konsiderojnë marrëveshjen e saj shumë pajtuese me Brukselin, për të ndryshuar qëndrim.
