Beogradi është zemëruar tejmase pse për nder të 100 vjetorit të përfundimit të Luftës së Parë Botërore në tempullin Notre Dame de Paris krahas flamujve të tjerë valon edhe flamuri i shtetit më të ri të Europës, Kosovës.
Sipas medieve serbe Beogradi ende po shqyrton mënyrën e reagimit ndaj Francës mikpritëse të këtij manifestimi.
Sipas Beogradit, që vendosjen e flamurit të Kosovës e cilëson veprim skandaloz, thotë se formalisht pas këtij akti qëndron Kisha, në fakt vetë shteti i Francës është ai që ka njohur pavarësinë e Kosovës që më 2008. Mediat serbe shkruajnë se mbetet të shihet pas ndonjë dite nëse vendosja e flamurit të Kosovës përbën uverytren e ikonografisë që do të shoqërojë shënimin e përfundimit të Luftës së Madhe në Paris, në të cilën do të marrin pjesë liderët e të gjithë botës.
Në këtë manifestim është ftuar edhe presidenti i Serbisë, por edhe presidenti i Republikës së Kosovës, Hashim Thgaçi. Gazeta serbe “V.Novosti” citon burime sipas të cilave në Notre Dam janë vendosur flamujt e shteteve në bazë të listës së të ftuarve të presidentit të Francës, Emanuel Macron.
Tash për tash, siç shkruajnë mediat e Beogradit, transmeton Koha.net, mbetet e panjohur se si do të sillen autoritetet franceze në ceremoninë e ardhshme kur bëhet fjalë për dekorin zyrtar.
Sipas tyre, nëse dëshiron që të bëhet dekori zyrtar ashtu si i ka hije i një momenti të rëndësishëm në historinë e njerëzimit siç është njëqindvjetori i përfundimit të njërës nga luftërat më të përgjakshme që nga krijimi i botës, Franca do të duhej t’i jepte rëndësi edhe dekorit të përshtatshëm, ku hyjnë edhe flamujt, sikur ua mëson mirësjelljen francezëve Beogradi, duke e quajtur të pakapërdishëm (flamurin e Kosovës) për vendet që nuk e kanë njohur pavarësinë e Kosovës.
Mediat serbe ia kujtojnë Francës si “zgjidhje” modelin e Bashkimit Europian, e cila në takimet zyrtare me liderët e Ballkanit Perëndimor përdor formulën e quajtur Gimnih, sipas të cilës pjesëmarrësit prezantohen vetëm me emra, pa titullin e shtetit ose shquarje të simboleve zyrtare. Megjithatë këto media janë të vetëdijshme se një moment kaq simbolik, si përfundimi i Luftës së Parë Botërore, do të ishte i paimagjinueshëm pa simbolet shtetërore./Kosova Post/