Kryeministri Edi Rama i pranishëm në Berat për ciklin kombëtar “Bashkia që Duam” thumboi opozitën e bashkuar, e cila pasi dogji mandatet, vijon organizimet për protesta duke kërkuar zgjedhje të parakohshme dhe krijimin e një qeveri tranzitore.
Ai tha se qeveria shqiptare nuk ka asnjë betejë me opozitën, pasi këto shtoi kryeministri, Partia Socialiste i ka fituar gjithmonë. Shefi i qeverisë pohoi se beteja e madhe e qeverisjes është papunësia, korrupsioni dhe problemet në administratë.
“Ne nuk kemi betejë me ta, sepse e kemi fituar dhe e fitojmë sa herë, por betejën e vërtetë e kemi me papunësinë, varfërinë dhe korrupsionin. E kemi me atë që vijojnë të jenë ende në zyrat e shtetit dhe nuk janë të denjë për t’u shërbyer qytetarëve. Qyteti i Beratit ka ndryshuar shumë, por ka edhe më shumë për të ndryshuar. Potenciali është për të zhvilluar jo vetëm turizmin, por edhe agroturizmin”, tha Rama.