Prindërit e 26-vjeçares vietnameze, Phan Thi Tra My, që ishte mes 39 viktimave të kamionit të tmerrit në Angli, kanë bërë një rrëfim rrëqethës.
Ata tregojnë se i kishin dhënë vajzës së tyre 30 mijë paund me vete, duke i rezervuar një vend VIP, që të bënte një udhëtim të rehatshëm, por ka ndodhur e kundërta dhe vajza e tyre u gjet e ngrirë në kamionin frigoriferik, rrugës për në Britani.
CNN ka shkuar tek shtëpia e të resë duke intervistuar prindërit, të cilët janë të kapluar nga dhimbja.
“Trafikantët na thanë se do të rezervonin një vend VIP për vajzën tonë dhe për këtë neve na u desh të paguanim 30 000 paund që vajza jonë të mbërrinte shëndosh e mirë pa vuajtje në Britaninë e Madhe”, shprehet babai duke theksuar se tani humbën edhe vajzën edhe paratë.
“Ata nuk na treguan se me çfarë do të udhëtohej, por këmbëngulën se do të ishte një udhëtim shumë i sigurt”, vijoi babai.
Mediat britanike raportojnë se është një numër i madh familjesh që ndodhen në ankth për të afërmit të tyre pasi ishin nisur për të shkuar në Angli.
Një ditë më parë u publikuan mesazhet e 26-vjeçares ndaj nënës teksa i thoshte se ishte duke vdekur për shkak se nuk merrte dot frymë.
“Mami më vjen keq. Udhëtimi im nuk përfundoi me sukses. Jam duke vdekur, pasi nuk marr dot frymë”, i shkruan ajo ndër të tjera të ëmës.
Policia britanike gjeti 39 viktimë në kamionin frigorifer, për të cilët tha se ishin me origjinë nga Kina.
Megjithatë duhet të përfundojë identifikimi i plotë i viktimave për të pasur një panoramë më të qartë të origjinës së tyre.