Morientes: Edhe rivaliteti ka anën e tij të respektit

Ambasadori i La Ligës në futboll, Fernando Morientes ka nxitur lojtarët e Barcelonës të formojnë një “tunel nderimi” për futbollistët e Realit të Madridit përpara nisjes së “El Clasico”-s së të shtunës, në “Bernabeu”.

Reali mposhti Gremion 1-0 më 16 dhjetor, për të fituar për të dytën herë radhazi Botërorin e Klubeve, ndërsa dy rreshtat e futbollistëve kundërshtarë që mirëpresin në fushën e blertë një kampion të sapokurorëzuar është një porosi në futbollin spanjoll.

Cristiano Ronaldo tha gjatë javës së kaluar në Abu Dhabi se, mendon që do të ishte një “gjest i bukur”, por “pasillo” (korridori) nuk është i detyrueshëm. Edhe drejtori i marrëdhënieve institucionale të Barcelonës, Guillermo Amor tha se, ky nuk do të ishte rasti i duhur, duke qenë se La Liga është një tjetër kompeticion nga Botërori i Klubeve.

Megjithatë, Morientes, i cili ka luajtur 182 ndeshje me Realin mes viteve 1997-2005, tha për “Marca”-n:

“Besoj se ky është një ligj i pashkruar. Askush nuk mund ta detyrojë dikë që të formojë këtë korridor nderi, por është thjesht çështje sjelljeje dhe respekti. Kjo është gjëja më e mirë që mund t’u tregojmë brezave të rinj. Nëse do të ishte Reali që duhej ta bënte diçka të tillë, do të flisja njësoj. E di që ka shumë rivalitet mes dy skuadrave, por ka edhe një marrëdhënie normale njerëzore. Edhe imazhi në dhomat e zhveshjes, kur ata u japin duart njëri-tjetrit është i rëndësishëm, por kjo shpesh nuk shihet nga kamerat. Më pas, kur zbresin në fushë nuk ka më miq, pasi të gjithë duan të fitojnë”.
/
Reali ndjek me 11 pikë më pak Barcelonën kryesuese në La Liga, por edhe me një ndeshje më shumë për të zhvilluar./Top Channel/

- ISLAMSHOP.CH -spot_img

LEXO MË SHUMË

Së fundi