Qyteti i Kavajës ka përkujtuar sot “Ditën e Rinisë” në një formë ndryshe dhe shumë domethënëse.
Kryetari i Bashkisë së Kavajës z.Isa Sakja ka qenë i pranishëm në Parkun Rekreativ të qytetit, ku së bashku me të rinjtë e Forumit Rinor të Partisë Demokratike mbollën sot 28 pemë në shenjë nderimi për demostratat që sollën rrëzimin e Sistemit Komunist 28 vite më parë.
“Ashtu si sot ku të rinjtë po i japin jetë mushkërisë së re të qytetit, i ndërtuar tërësisht me fondet e Bashkisë Kavajë, rinia ka qenë gjithmonë promotore e ndryshimeve të mëdha”, tha z.Sakja.
Pasi i falenderoi të rinjtë Forumit Rinor të Partisë Demokratike, Sakja ftoi të gjithë qytetarët që edhe ata të bëhen pjesë e kësaj nisme duke mbjellë një pemë, e cila sipas tij do ta bëjë Kavajën edhe më të bukur.
Parku Rekreativ është një investim i Bashkisë Kavajë në një hapsirë prej 8 mijë metrash katërorë ku do të përfshihen hapsira të gjelbërta, kënde lojrash për fëmijë, kënde sportive dhe shëtitore./Rtv Drita/