Abilekaj: Protesta e gazetarëve, e pazakontë! Ja cilët portale shpifin dhe pse ligji i Ramës nuk i rregullon dot

Gazetari Enton Abilekaj e cilësoi të pazakontë protestën e gazetarëve kundër paketës anti-shpifje të qeverisë.

I ftuar në rubrikën “Opinion”, në News24, Abilekaj tha se edhe arsyeja për të cilën u bë protesta është e pazakontë dhe ndodhë për herë të parë në këto 30 vite, pasi sipas tij, nuk ka ndodhur më parë që qeveria të bënte një ligj për të shtypur mediat.

“Protesta flet vetë, prania e gazetarëve aty është e pazakontë. Kemi të bëjmë me një rast të pazakontë në 30 vite, rast unikal, ku qeveria bën ligj për të shtypur mediat. Nuk ka pasur asnjëherë asnjë ligj për të shtypur mediat, ka pasur tentativa të forta, arrestime gazetarësh, rrahje, presione, gjoba të rënda, por jo një ligj. Ky është një ligj që thotë se ‘nëse bëhet një lajm që nuk na pëlqen, kemi në dorë që lajmin ta heqim dhe t’iu gjobisim’”, tha Abilekaj.

Pse të mos konsiderohet kjo një paketë që do na mbronte nga shpifjet?
Ky sensibilitet po përdoret nga kryeministri. Ne kemi pasur një ligj për shtypin, që e abrogoi Berisha, duke thënë se ligji ka vetëm një nen “Media është e lirë”. Ligji e shmangte shpifjen. Ishte përgënjeshtrimi, që duhet të ndodhte brenda 24 orësh, por kjo ndodh kur ka dezinformim të paqëllimshëm. Në përgjithësi nuk kemi shpifje të qëllimshme. Të vetmet portale që bëjnë shpifje të qëllimshme janë ato të paregjistruara. AMA cilësohet si gjykatë, pasi vendimi i saj ndaj mediave ekzekutohet para se të shkojë në gjykatë. AMA i bie të jetë gjykatë e shkallës së parë.

Kur është hartuar kjo paketë a jeni pyetur ju gazetarët?

Paketa ka një vit që qarkullon. Që kur është parë në hyrje të saj është kërkuar njëzëri nga gazetarët që ky ligj të mos hyjë fare në diskutim, jo më të amendohet apo rregullohet. Të gjithë kemi kërkuar njëzëri që ky ligj të kthehet pas. I është kërkuar takim Edi Ramës nga 12 organizata që kanë ardhur, por nuk ka pranuar. Rama gënjen kur thotë se ka punuar me OSBE për një ditë për këtë draft, por në fakt ne nuk kemi draft. Ku është drafti? Draftin e nxori kryeministri mbrëmë, nuk e ka lexuar njeri. Të gjitha këto që ka publikuar kryeministri janë amendamente.

Rudina Hajdari replikoi me Ramën, ajo i kërkoi kryeministrit të tërhiqet … A do të kishte nevojë kjo paketë për të tjera sugjerime, që do ta përmirësonin, dhe a do të ishte e nevojshme 1 javë kohë që kërkoi Hajdari?
Kjo është jashtë çdo procedure. Nuk ka nevojë për Rudina Hajdarin. Mediat vetërregullohen në të gjithë botën, nuk e rregullon Parlamenti. Ata vijnë për qejfin e tyre në Parlament, por askush nuk ka kërkuar ndihmë nga partitë apo grupet që kemi në Parlament. Ne nuk kërkojmë ndihmë nga ata që duhet t’i rregullojmë. Në protestë duhet të marrin pjesë të gjithë shqiptarët, sepse bëhet fjalë për lirinë e tyre. Ky ligj nuk e ndalon shpifjen, por shpifjes i jep dy statuse. Ne kërkojmë të mos ndërhyjnë dhe e kemi gati vetërregullimin, që do të bëhet deri në janar. Nuk jam në dijeni çfarë përmban, ka një Këshill Etike, i përbërë nga gazetarët, që ndjek të gjitha mediat. Për çdo lajm, ata rekomandojnë përgënjeshtrimin, siç ndodh në të gjithë botën. Rama vetëm ka shpifur sot në Parlament. Rama gënjen me qëllim për të kaluar një akt censure në Parlament. Ky ligj nuk e rregullon mënyrën e financimit të portaleve, sepse ligji nuk detyron portalet të regjistrohen.

Rama tha se lajmet kanë marrë jetë njerëzish … Pse ishte e nevojshme kjo paketë?
Kjo paketë nuk bën asgjë në treg. Ka media që përdorin shantazhin për të marrë reklama, që janë në përgjithësi media joserioze, si çdo gjobaxhi në rrugë. Këto shantazhe nuk shmangen me këtë ligj, sepse një portal i paregjistruar, pa emër pronari, pa emër gazetari, i bën të njëjtin shantazh një biznesmeni apo një politikani, dhe do jemi sërish aty ku ishim. Ai ligj nuk i rregullon këto. Më shumë se kryeministri nuk i dëmton asgjë bizneset në Shqipëri. Pse s’vijnë investitorët e huaj në Shqipëri, prej portaleve apo prej kryeministrit? Ky që ka larguar çdo biznesmen të huaj na thotë neve se kemi nevojë për rregullim. Kjo është e tmerrshme.

A besoni se do të miratohet projekt-ligji antishpifje? Pse thoni se Edi Rama është shpifësi më i madh?

Ne kemi sistem gjobaxhinjsh, që është në qeveri. Shpifësi më i madh në vend është Edi Rama. Rama shpifi njëherë duke thënë se në BE dënohet shpifja, tjetër tha se AMA nuk do bëhet gjykatë.  Rama u shpreh se BE e OSBE jaën pro këtij drafti, ndërsa në të vërtetë OSBE është totalisht kundër. Gënjeshtrat dalin nga Zyra e Shtypit e kryeministrit. Nuk ka gjasa që të tërhiqet Rama, sepse ai tha do ta miratojmë. Besoj se presidenti do e kthejë. Ligji do të diskutohet në Kuvend në janar. Shpresoj të ketë më pas presion ndërkombëtar. Edhe nëse ligji miratohet, ne prapë do të vazhdojmë të informojmë. ERTV është një nga shpifësit më të mëdhenj. Me këtë ligj, Rama do heq lajmet me një telefon. Do i heqë sa nëpërmjet AMA-s, ashtu edhe për AKEP. Ne kërcënohemi nga fjala e lirë.

- ISLAMSHOP.CH -spot_img

LEXO MË SHUMË

Së fundi